බැරිද මට කාලයක් ආපස්ස හරවන්න?

රේඩියෝව කරකවමින්
මධුමාධවි අහන්නට
කෝරළේ මහත්තයා දැන්
ඒවි යැයි කියන්නට
කුඩා නියර පෙළ දිගේ
ඇවිදගෙන යන්නට
ආයෙ දවසක් ඒවි යයි
නිකමට හෝ හිතන්නට

වතුරකඩ ගලින් බැඳ
ඇළ වේලි තනන්නට
එඬරු වැට අද්දර
ඉස්කෝලේ ඇරී
එනතුරු මඟ බලන්නට
උම්මග්ග ජාතකේ
මහෞෂධ වෙන පාර කපන්නට 
නිකමට හෝ ආයෙමත් 
ඔබ එතැයි හිතන්නට

ඔබ හිටිය නම් මට
මෙහෙම තනි කම නැති බව
කුමාරයෙක් වගේ මම
රාස්සයන් පරදනා වග
ලියා යවනට ඔබ වෙත
ඇත්තේ ම නැද්ද විදිහක්
ඔබ කොහේදැයි මට
හොයා ගන්නට විදිහක්

කැරැල්ලට දුව ගිහින්
කළු ගලේ හැප්පෙන්න
අම්බරුන් පෙළ ද
අමතක නොකර ගෙන යන්න
ගිගුම් දෙන වරුසාවෙ
ඉලුක් කොළ අතරින්න
බැරිද මට කාලයක්
ආපස්ස හරවන්න

* සීයාට

Pic. - Anna Lee Dey Stacey, American, 1865 - 1943