මීදුම

මීදුම දකින විට ඔබ හද
ශෝකයෙන් පලා යන්නෙද
අතරින් පතර යටගිය
මතකයන් ඇදී එන්නෙද

මටත් එහෙමයි මිතුර
එහෙත් මම ආදරෙයි මිහිදුමට

උදෑසන මීදුම තල්ලු කරමින් අහකට
මිදුල අමැදූ ආච්චිගෙ මුහුණ
මැකී නැත තවම
බිඳක්වත් මතකයෙන් බැහැරව

වියළි පොල් අතු මිටක් සමඟින්
අවදිකරමින් ලිප
මිහිදුමට එනු පිණිස ගෙතුළට
අම්මා අරියි කවුළු දොර

හාන්සි පුටුවට වී සීයා
පෙන්වයි මිනිබිරිය වෙත
'කඳු මුදුන් වුණත් පුත
මිහිදුම පැමිණි විට අපැහැදිලි බව'

මිහිදුමත් සමඟම
ඔවුන්ගේ හඬ බැහැර ගිය කල
මීදුම කියන්නේ
වේදනාවෙන් උමතු විය යුතු දෙයක් මිනිබිරියකට!

Picture - Lise Auger, Canadian